极速做完后期赶住播的《灿烂的外母》昨晚(29日)正式出街，第一集就有家燕姐与黎诺懿的床上戏，有观众话好搞笑，都有人话重口味。不过，剧集还有其他值得睇的地方，就是靓女汤洛雯。她在剧中饰演家燕姐个女、黎诺懿的青梅竹马，之后仲同对方有感情线。虽然她在首集中后段才出场，但有网民大讚她越来越靓，更为她做女主角感到高兴；加上她每次在Big Big Channel开Live都有过万人睇，看来她的观众缘非常好。

首先回顾一下靓汤的演艺生涯，佢2012年参加香港小姐，当年係大热门嚟㗎！虽然最后不敌黄心颖同朱千雪，但都有齐齐加入TVB。入行冇耐就有处境剧《爱·回家》拍，做「思思」一角，佢个清纯邻家女孩Look成功入屋，已经有唔少网民讚佢好靓，做得好好。之后佢就同一众上位花旦李佳芯、黄心颖、麦美恩等等做综艺节目《学是学非》，成为「是非精」都储到一班fans。不过，纵观嚟睇，靓汤未必好似其他女演员咁，有咁多机会、咁快做女一。相比之下，今次《灿烂的外母》担任女主角，呢个机会真係等咗好耐。靓汤早前接受专访时都有讲过：「每个人都会有快慢，都冇话羡慕边个。而家就…我touchwood先，觉得自己so far发展得几好喎！所以做唔做到女主角都话唔埋嘅，做好自己重要啲！」

对比之前思思嘅角色，今次靓汤个造型成熟咗唔少。

网民讲起靓汤，有好热烈嘅讨论。除咗话佢真係好靓之外，都会提起：「佢係无綫五虎之一汤镇业嘅姪女！」听到有亲戚都係做演员，自然就会联想到有护荫，不过都有网民突破盲肠，表示：「如果佢係靠叔叔上位，一早做咗女主角喇！」言下之意，都相信靓汤係靠自己，先至有今日嘅机会！佢都回应过呢个话题，最初都有试过唔开心：「其实呢个问题几年前开始有，初时会有唔开心。因为出街都係叫我边个边个姪女，我都会好担心会唔会一直都畀人咁叫呢？但最近好得意地，好似多咗人叫得出我个名，唔係叫我乜乜姪女，唔係叫我是非精，多咗人知道我係边个，所以而家都唔会特别介意叫我做其他称号，我最想就係有人记得。」而家佢做到喇！

好多人都话靓汤越来越靓女～